Zumtu ulenau hna,

Pathian lamhruainak thawng in 2025 Kum Thar kan phan kho. Zeizong vialte cung ah Bawipa cu thangṭhat si ko seh.

2025 Kum ICBC khrihfabu i kan tlangtaar cu “Tuahnak tel Zumhnak” (Faith in Action) ti a si. Hi kum chung ahhin vawlei nih zeidah a chuahpi lai, ti kan hngal kho lo. Zeihmanh chuak ai kun, hi kum chung ahhin Pathian biatak kan theih, kan zumh, i kan cohlanmi hi tuarsernak in kan langhter kum siseh, ti hi kan saduhthah a si.

 Pathian bia nih a kan cawnpiak mi cu, “Ka u le ka nau hna, pakhatkhat nih, ‘Zumhnak ka ngei,’ ti seh law, cu zumhnak cu a tuahnak nih a langhter ṭung lo ahcun, zeidah a ṭhathnem? Cu zumhnak nih cun a khamh khawh lai maw? A biana ah, hnipuan a herhmi le rawl ei awk a ngei lomi nan unau an um hnga. Cu hna cu i thawh riangmang in, ‘Pathian nih thluachuah in pe ko hna seh. Lum tein um u law khim tein ei u,’ ti cu, an herhmi nan pek ṭung hna lo ahcun zeidah a ṭhathnem? Cu bantukte cu zumhnak zong cu a si ve, tuahnak zeihmanh a chuahter lo ahcun a thimi thil a si ko,” ti a si (Jeim 2:14-17).  

 Pathian bia nih, tuahnak zeihmanh a chuahter lo mi zumhnak cu a thi mi a si, a ti. Hi bia hi “khamhnak cu zumhnak le tuahnak fonh in hmuhmi a si” tinak a si hrimhrim lo. Khamhnak cu Pathian laksawng a si i Jesuh Khrih zumhnak thawng lawnglawng in hmuhmi a si (Efesa 2:8). Hika ah Jeim Cakuat nih a kan cawnpiakmi cu, a dikmi zumhnak (genuine faith) cu a nung i a cawlcang i rian a ṭuanmi a si, ti tu hi a si. Cu zumhnak cu zumtu hmasa hna nih an rak ngeih ca ah dahkaw midang nih “van le vawlei khupthal a lettu hna,” tiin an rak auh hna cu.

Cubantuk in, 2025 kum cu ICBC khrihfabu nih, a lam kip in, kan zumhnak cu tuahsernak in kan langhter kum a si lai. Bupi nih siseh, ministries le committees kip nih siseh, pumpaak le chungkhar kip nih siseh, kan thlacamnak le tinhmi kip ah kan tlangtaar hoih in karhlan kan i zuam lai. Tahchunhnak ah:

1.      Riangvai (homeless) rawlpeknak ah,

2.      Khrihfabu chung mizaw zual le hartongmi hna zuanhnawhnak ah,

3.      Kan ram chung ral ruang ah harnak faakpi a tongmi kan miphun zuanhnawhnak le bawmhchanhnak kong ah,

4.      Pathian bia cu nifatin thlarau rawl a si, ti kan zumh bantuk in kum khat chung nifatin Baibal relnak lei ah,

5.      Thawngṭha chimnak, Baibal Conference, le training kan ngeih dingmi hna ah, kan tlangtaar ning in kan zumhnak cu tuahsernak in langhter kan i zuam lai.

 Khrihfa Hlabu No. 387 caang thumnak ah: “Zumh hnga tluk in kan zum maw? A chim bang in kan nung maw? Amah ta lawng kan si maw? Zumhnak cu rian ah lang seh,” tiah kan sak bang in, tu kum cu tuahsernak in kan zumhnak kan langhter kum ah cang hram seh. ICBC Tlangtaar: “Pakhat le Pakhat i daw u” zong tu kum cu a tuah in tuah hna u sih.

Bawipa nih hi Kum Thar chung ah taksa, thinlung, le thlarau damnak le lawmhnak in pe hram hna seh. Bawipa thluachuah cu pumpaak le chungkhar nan cung cio ah tling tein phan hram ko seh, tiah thla kan in campiak hna.

ICBC Pastor te aiawh in,

Lal Cung Awi

Lead Pastor